Reuseskenking voed talle honger mae - VeggieMeat kosprojek

Te danke aan ’n anonieme skenker kon Helpende Hand hande neem met ander rolspelers om te sorg dat nagenoeg 150 000 etes onder behoeftiges versprei word. Anton Smith, voorsitter van Helpende Hand se Centurion-tak, het die skenking in ontvangs geneem en die ondersteuningssentrum, Moeggesukkel sodoende bemagtig om ’n voedsame en bekostigbare voedselaanleg by hul perseel in Centurion op te rig.

“Nie net kan ons nou sorg dat die volk goedkoper en gesonde kos kry nie, maar intsussen skep ons ook werk. Die produk, VeggieMeat, word beskryf as ’n voedsame oplossing om behoeftiges mee te voed,” sê Smith. Jacques Papenfus, stigter van Moeggesukkel, praat met passie oor sy sentrum, asook VeggieMeat wat hongersnood spotgoedkoop gaan bekamp.

“Moeggesukkel verander sedert ons stigting in 2011 die lewens van hawelose mans én mans wat in ’n web van dwelm en drankverslawing verstrengel geraak het. Ons werk ook sedert ons stigting nou saam met Helpende Hand aangesien albei instansies glo aan die konsep om mense op die regte manier en volhoubaar te help,” sê Papenfus.

Dié twee instansies het vroeër saam die #GeeReg-inisiatief van stapel gestuur wat die publiek aanmoedig om meer verantwoordelik te gee wanneer hulle haweloses en behoeftige mense wil help. “Om reg te gee is nie die R20 wat jy by die venster uitdruk vir iemand by ’n verkeerslig nie – dit is om onverantwoordelik te gee. #GeeReg is daar om seker te maak dat wat jy gee reg aangewend word en werklik iemand ophef en dat jy nie net die persoon se bestaande nood of verslawing onderhou nie,” verduidelik Papenfus.

Hy verduidelik Moeggesukkel kan met dié skenking volhou om VeggieMeat - wat uit 100% plant gebaseerde proteïen bestaan, te vervaardig. “Nie net is dit voedsaam en heerlik nie, ’n mens kan elke dag van die week ’n ander gereg daarvan maak. Die produk bestaan meestal uit gedroogte soja met ’n poeier vol vitamiene. Een pak kos R20 en kan 6 volwassenes voed of 10 kinders. Dit is ook Vegan-vriendelik en ’n mens kan disse soos kerrie en rys, brijani, pasta, allerlei soppe en selfs bobotie maak,” voeg Papenfus by.

Smith sê soja word aangekoop en by Moeggesukkel se aanleg verwerk en verpak, voordat dit landwyd deur Helpende Hand se strukture versprei en uitgedeel word. “Vir ons is kos se voedingswaarde baie belangrik en nie noodwendig die prys daarvan nie. So dit is ’n seëning dat die produk en Moeggesukkel oor ons pad gekom het,” voeg Smith by.

Oor werkskepping sê Smith die kosaanleg verseker tans 30 geleenthede. Met die aanleg en te danke aan die skenking kon nagenoeg 25 000 pakke kos versprei word. Dit is nagenoeg 150 000 etes. Papenfus sê daar is nog talle planne in die pyplyn en Helpende Hand se Centurion-tak het uit die skenking ook die toerusting aangekoop om die soja te gebruik om verwerkte vleis soos Weense worsies, polonie en salami te maak. Hierdie uitbreiding het ’n verdere tien werksgeleenthede geskep.

Moeggesukkel het uit ’n gebaar van dankbaarheid verlede week ’n Renault Kwid-voertuig aan Helpende Hand geskenk wat deur sy maatskaplike werkers aangewend gaan word wanneer hulle die land deur reis om assesserings te doen om gesinne in nood by te staan.

“Hierdie is vir ons ’n wen-wen samewerking. Ons glo in die konsep om reg te gee en ook ons ondersteuners die gemoedsrus te gee dat hulle skenkings reg aangewend word om armoede te verlig, te verbreek en te voorkom. Die voertuig is vir Helpende Hand ’n geweldige bate om maatskaplike werkers te help doen wat hulle moet doen,” sê Hannes Noëth, Helpende Hand se direkteur, wat die motor in ontvangs geneem het.

*Die publiek kan dié twee instansies help deur om VeggieMeat vir hulself aan te koop. Hulle kan ook geldelike bydraes maak, waarmee die produk aangekoop en onder behoeftiges versprei sal word. Vir meer inligting besoek www.moeggesukkel.co.za.

VeggieMeat uitdeelaksie

Vir enige navrae stuur gerus 'n epos aan [email protected]

Elke dag in die strate van Pretoria en Centurion word daar ‘n bedrag van tot R4 miljoen in bedelaars se sakke steek. Deur Solidariteit Helpende Hand se navorsing het ons vasgestel dat tot 90% van bedelaars dwelms misbruik. Die probleem word elke dag net groter.

Buiten vir die kriminele aktiwiteite van sekere dwelmgebruikers, beteken dit ook dat daar ’n groot risiko is vir ons kinders om aan dwelmhandel blootgestel te word. Dwelms is nou algemeen in baie skole, selfs in ons laerskole. Weet jy werklik of jou kind nie daaraan blootgestel is nie?

Dit is nou in ons elkeen se hande om deel van die oplossing te wees. Ons daag die publiek uit: #geeREG!

Rehabilitasie

Die eerste stap in die proses is om die bedelaar wat betrokke is by dwelms te bereik deur die mense wat by die kospunt hulle bearbei. Oor ’n tydperk word die verhouding gebou en word die dwelmgebruiker oortuig om sy lewe te verander. Hy wil dan graag gerehabiliteer word. Van daar sal hy in die Moeggesukkel rehabilitasiesentrum opgeneem word waar hy deur ‘n strawwe program sal gaan vir so lank as wat nodig is om van sy spesifieke verslawing vry te kom.

Van die tweede dag wat hy in die rehabilitasiesentrum se plaas is, sal hy begin om terug te gee aan die gemeenskap. Hy sal deel uitmaak van ’n span wat werk om die sentrum te onderhou en sy aanleg sal bepaal word. Daarna sal hy by een van die besighede van die sentrum betrokke raak om ’n inkomste te verdien. Dit kan wees dat hy by een van die kospunte ook kan diens doen om met ander dwelmverslaafdes te gesels en hulle te bemoedig. Sodoende ploeg hy terug in sy gemeenskap en skep hoop vir ander verslaafdes.

Vanaf 2015 is meer as 160 dwelmverslaafdes al deur die projek van die strate af na die rehabilitasiesentrum en geplaas in werke.

Indien die persoon terugval in dwelmverslawing, kry hulle ’n tweede geleentheid om deur die rehabilitasieprogram te gaan wat spesifiek gemik is op dié mense wat sukkel om ontslae te raak van die verslawing.

Kontak ons

Om ’n afspraak te reël vir die stigters van die projek om by jou kerk of skool te kom gesels, kontak ons op 012 111 8360 of [email protected]

Ons Vennote:
Pharos www.pharos.org.za
Signarama www.signarama.co.za/store/silverton
Solidariteit Helpende Hand- www.helpendehand.co.za

Een Minuut Aansluiting

  • This field is for validation purposes and should be left unchanged.